သ္ဘင်စှ်ေဘာပ္တိုန်ဂုဏ်စရာဲကွးဘာဌာန − ပရေင်ပညာ ရုင်ဟံင်ပြာ်မန် ကၟိန်ဍုင်မလေဝ်ယှာ ဒေသဍုင်အလဝ်သတာ
နာဲဝဳရမန်
11/2/20251 min read
ပ္ဍဲကဵုစၟတ်တ္ၚဲ (၀၁၊ ဂိတု ၁၁ ၊ သၞာံ ၂၀၂၅ ) တ္ၚဲသ္ၚိသဝ်ဝွံ ကၠောန်သ္ပလဝ်သ္ဘၚ်စှ်ေဘာပတိုန်ဂုဏ်စရာဲကဵုလာဘ်ကွးဘာ ဌာန ပရေၚ်ပညာ ရုၚ်ဟံၚ်ပြာ်မန် ကၟိန်ဍုၚ်မလေဝ်ယှာ ဒေသဍုၚ်အလဝ်သတာ နွံရောၚ်၊၊
သ္ဘၚ်ဝွံ ရန်တၟံ ပ္ဍဲကဵုပွိုၚ်မွဲသၞာံ ကွးဘာဂမၠိုၚ် ရုန်ဂစာန်ကတ်လ္ၚတ်လဝ်ဂှ် ဂွံဒှ်အာဇြဟတ်စိုတ် ပ္ဍဲပရေၚ်အံၚ်ဇၞးမာန် တုဲ ကၠောန်သ္ပဏာ အသေအဟာန် ပတိုန်ဂုဏ်စရာဲကဵုလာဘ်ကုကွးဘာတံရ၊၊ အစဳဇန်အသေအဟာန်ဝွံ နူဂယး (၉း၀၀) စဵုကဵုစိုပ် လဒေါဝ်တ္ၚဲ (၁၂း၀၀) နာဍီ ကဏ္ဍ ဟီုဂလာန် ၊ ကဏ္ဍလှ်ေထ္ၜးယေန်သၞာၚ်၊ ကဏ္ဍကဵုလာဘ် ကၠောန်သ္ပလဝ် (၃) ကဏ္ဍမဒှ်ရ။ ပ္ဍဲဂှ်ညးတာလျိုၚ် ဌာန−ပရေၚ်ပညာ ရုၚ်ဟံၚ်ပြာ်မန် ကၟိန်ဍုၚ်မလေဝ်ယှာ ဒေသဍုၚ်အလဝ်သတာ နာဲဝဳရမန် ဟီုဏာ ဂလာန်ဒုၚ်တၠုၚ်တုဲ မွဲအဆက်ဓဝ် ဥက္ကဌ ရုၚ်ဟံၚ်ပြာ်မန် နာဲသာၚ်ဝဏ္ဏ ဟီုလဴထ္ၜးပရူပရာ အကာဲအရာ ပွဳပွူဂကူမန် ကၟိန်ဍုၚ်မလေဝ်ယှာကေုာံဂလာန်တၚ်ဂုဏ်သာ်ဏံရ၊ ‘‘ပိုဲဂှ် ပ္ဍဲဍုၚ်မလေဝ်ယှာဏံတှ်ေ ဒှ်ဂကောံဟံၚ်ပြာ်မန်ရ၊ ဂကူမန်ပိုဲဂှ် ကၠောန်မံၚ်ကမၠောန် ကၠောန်ကၠအ်ထၜိုတ်၊ သိုၚ်သ္ၚိ ကေုာံ ဆေၚ်စသုၚ်တံလေဝ် ကၠောန်မံၚ်ညိည ပ္ဍဲဍုၚ်မလေဝ်ယှာဏံကီုရ၊ ပိုဲဂှ် ဟိုတ်နူဍုၚ်ပိုဲ ဟွံပြေပြံၚ် အကာဲအရာပရေၚ်ဍုၚ်ကွာန်ဒှ်မံၚ်ပၞာန်တုဲ ပိုဲတံကၠုၚ်ဓလေတ်ပါဲမံၚ်ဒၟံၚ် ကၟိန်ဍုၚ်မလေဝ်ယှာခေတ္တယာယဳရ၊ တၚ်ဂုဏ်ကုအလဵုသဳမလေဝ်ယှာတံ ညးတံကၟာတ်လဝ် မုတ်ညးတံ မွဲလ္ပာ်တုဲ ပိုဲဂွံမံၚ်လၟုဟ်ဏံဂှ် တၚ်ဏာဂုဏ် ဗွဲမလောန်ရဂှ် နကဵုအဲ ဟီုမံၚ်လၟိုန်ရ၊ ဍုၚ်ပိုဲအကာဲအရာကလေၚ်ပြေပြံၚ်တိုန်တှ်ေ ပိုဲတံကလေၚ်စဴဏောၚ် ခေတ္တ ချိၚ်ခဏလၟုဟ်ဏံဂှ် ကဵုမံၚ်ရီုဗၚ်ကုပိုဲ ဂကောံNGOs သီုညးတၠဒါန် ဖအိုတ်တံဂှ်တၚ်ဂုဏ်ဗွဲလောန်ရ ဂတနူဏံလေဝ်ဆက်တုဲ ထံက်ပၚ်ရီုဗၚ်အာပိုဲညိ’’ သာ်ဝွံ ညးသ္ဂး နကဵုဘာသာ အၚ်ဂလိက်ရ၊၊
ပ္ဍဲအသေအဟာန်ဝွံ ကောန်ကွးဘာ ၃၀တၠပြၚ်၊ ဂကောံမိမကွးဘာ၊ဂကောံကမ္မတီပူဗိုၚ် ပရေၚ်ပညာ ရုၚ်ဟံၚ်ပြာ်မန် ကၟိန်ဍုၚ်မလေဝ်ယှာ ဍုၚ်အလဝ်သတာ၊ ကေုာံဂကောံညးဒေသ NGOsဂမၠိုၚ် တိုန်စိုပ်နွံရောၚ်၊၊
ဌာနပရေၚ်ပညာ ရုၚ်ဟံၚ်ပြာ်မန် ကၟိန်ဍုၚ်မလေဝ်ယှာ ဒေသဍုၚ်အလဝ်သတာဏံဝွံ ရန်တၟံကဵုကောန်ၚာ်သၟတ်မန် မတန်တဴမံၚ်တွဵုရးကဍး ပယျဵုသေံကဵုမလေဝ်ယှာဏံဂွံကတ်လ္ၚတ်သုၚ်ဍာ်တှ်ပညာမာန် ဒုၚ်သ္ဇိုၚ်ကဵုဂကောံရုၚ်ဟံၚ်ပြာ်မန်တုဲ ပံၚ်တဲကုဂကူမန် ညးမဆာန်ဂကူ ဆာန်ပရေၚ်ပညာ ဒေသကဍးတေံတုဲ ပ္ဍဲကဵုစၟတ် (၂၀၊ ဂိတု ၀၂ ၊ ၂၀၂၄ ) တ္ၚဲဗုဒ္ဓဝါတေံ စပံက်ကၠုၚ်ဘာဌာနပရေၚ်ပညာ ရုၚ်ဟံၚ်ပြာ်မန် ကၟိန်ဍုၚ်မလေဝ်ယှာ ဒေသဍုၚ်အလဝ်သတာ ရောၚ်၊၊
Gallery
